平時聽專家分析後市，常聽到幾個金句，「後市點走，好視乎資金流向」，這個字面上係冇得輸的，多資金流入買貨，梗係升嘅機會大啦，反之亦然。這個鐵律其實是可以量化的，大行有部門研究資金流向，並會定期出報告，而平時係較少人理會的，但通常出現咗大事件後，基金公司就會出來滯後分析，係呀新興市場第三季面對資金大量流出，所以跌咗咁多，喂，都就12月啦，仲講第三季！
作為散戶，要計資金流向唔易，都唔知從何入手，但有個資金就好易搵到數據，自製一個資金流向其實唔難，就是北水。港交所每天會公佈港股通的十大成交，而每月都有統計數字，如你唔嫌煩，CCASS的經紀持倉數字，絕對幫你計到個資金流向。戰友可能會話，北水都死晒啦，仲使乜去研究呀，的確，頭10個月，上海那邊有6個月凈流出，但總體仍是流入169億元，而深圳就積極得多，只有一個月是負數，總凈流入是1304億。
還記得平保(2318)喪買匯控(0005)嗎？由年頭至今已經增持了接近4億股，約300億的資金，換句話說唔計大笨象，走資的情況更嚴重。而另一重磅股騰訊(0700)，北水的流向算係舉足輕重，滬深於去年底共持有1.71億股騰訊，騰訊股價雖在2月時急插至400蚊，但北水持貨有增無減，直至3月時見頂那天，持貨增至1.87億股，即使南非股東配股，佢地都無畏無懼，高峰時揸2.07億股，但減持就由5月開始，至7、8月加速逃亡，去到8月尾，持股得返1.16億股，短短5個月，減持了9000萬股，價值逾300億，這亦是股王跌得最急之時。
資金流向，重點係睇趨勢，一兩天的數字不夠代表性，但能持續幾星期，就有啟示，北水在過去十日有八天都是凈流入買騰訊，雖然金額唔大，但這是近月罕見，下年會唔會再插青冰唔知，但今年應該低位已見吧......咦咪住，原來前兩日女股神又發出買入騰訊的訊號，咁究竟信數據定信女股神呢，自己諗。
-- Fb個人專頁 http://www.fb.com/chingbing888