春江水暖鴨先知，相信唔需要多解釋，大家都明白箇中意義，在股票市場，鴨仔都無處不在，好聽啲就叫醒目資金，因各種的原因，快市場一步得知消息，到大家都知的時候，他們就好消息出貨，飽食遠飈，所以無論係大中小股，最怕都係接咗鴨仔的火棒，因為隨時有排坐。
上月先進半導體(3355)提出私有化，於10月26日停牌，停牌前報0.90元，但戰友可以留意返，停牌前兩日由0.77元一度升至0.99元，升了差不多三成，兩日共有約1500萬股成交，但平時日均成交都未必有一百萬股的，可見今次鴨仔掃得好狠。
按通告所指，係根據中國公司法第172條以「吸收合併」的方式實施私有化，青冰雖然平時爬慣通告，但的確都唔係太睇得明前文後理，但個重點就是私有化價格為1.5元，要股東大會投票通過，及要內地監管審批。由於先進半導體是H股，牽涉的程序應該較其他港股更繁複，所需時間更長，按理在復牌後應存在至少5%的折讓，你又可以參考返中外運航運(0368)，在9月尾宣佈私有化後，長期都在2.6左右浮沉，距2.7元的私有化價，有3.7%折讓。
好喇，到先進半導體復牌當日，高位在1.39元，有8%折讓喎，不過開市後已向下，距離私有化價格愈來愈遠，最低做過1.26元，16%折讓啊。如前文所述，由於H股私有化需較長時間完成，有大折讓都可以理解，但超過一成的折讓，的確吸引唔少資金接貨，更加有戰友大叫「派錢呀」，經過幾天的消化獲利，近日已逐漸回升到1.4元，大概是6%折讓，。
究竟點解會咁急住沽，要錢唔要貨，相信同大量春江鴨有關，如果你是因私有化而來，博佢最終成事，十幾巴仙的確係吸引，但如果鴨仔係七八毫入市的，回報已經係六成，所以即使佢哋合埋眼隊落1.26，仍面不改容，但如果你做晒功課去捕捉這些機會，1.26接到的，亦不一定是火棒，反而是一個風險低的獲利機會。
前輩話機會是留畀有準備的人，希望成日都有呢啲機會啦。
Fb個人專頁 http://www.fb.com/chingbing888