第二隻同股不同權股票美團(3690)正式開始招股，跟小米(1810)不同，青冰近期聽到的評價，都是較正面，「巨無霸抽資三百幾億，雖然佢未有錢賺，但因為佢係等於香港的Openrice加Deliveroo加Ctrip，今年仲要買埋摩拜單車，可以講係概念無限，長線看好」。抱著虧損來上市，的確令青冰不寒而慄，遠的有tom集團(2383)，去年有美圖(1357)、眾安(6060)、雷蛇(1337)、易鑫(2858)，今年有平安好醫生(1833)及鐵塔(788)，當中的共通點係科網概念，冇咁快有盈利啦，但前景「應該」是秀麗的。當然，唔排除係青冰有偏見，其實仲有十隻八隻虧損中上市的股，最後成為火鳳凰的，戰友不妨留言提下。
去年幾隻火熱的新股，萬人空巷，隻隻搶爆，抽中就等於賺錢，經過大半年，全部都交過一兩份業績，雖則大致比上市時有改善，但股價就較招股價跌一半，閱文(0772)係唯一一間有盈利上市的，但佢的超高估值，亦令佢不敵地心吸力，由高位跌一半，今星期再次跌穿招股價。
雷蛇上市後交出的兩份業績仍然虧損，不過收入的確係有增長嘅，去年上市集資所得的四十幾億，本身主要係用來發展新遊戲及手機，仲有就係用來收購及研發，不過唔知係唔係股價跌得咗一半，公司就決定用四千萬來回購，共買入2638萬股，雖然佢地冇長短債務，但集資上市應該用作研究吧，上市後半價回購，作為股東唔知係咪要多謝你，係嘅，相比起四十幾億，呢四千萬真係濕濕碎，但留番啲錢搞好研發，可能更有助股價囉。留意番，執董許慶裕在四月時曾減持1120萬股，價錢係由2.81沽到落2.45，雖然沽貨與否係個人理財決定，可能好似領展(0823)CEO咁，沽貨都係為買樓畀個仔，但沽完之後再跌一蚊，難免更令股東搖頭。
雖然你心必對美團有興趣，但總有基金會捧場，資金從那裡來呢，似乎都會有部分係在市場中換馬所得，本身個市已經咁曳，仲要挨多一兩隻集資過百億的新股，的確令人憂心，至於炒唔炒得起呢隻幾千億的美團，留畀愛幻想的人去玩吧。
Fb個人專頁 http://www.fb.com/chingbing888
Fb個人專頁 http://www.fb.com/chingbing888