Q43181：
老師，我分注買了45萬股南方恆科(07552)，投入資金約70萬，這隻股就一直向下調，想問問下一步應如何走？小白上
龔成老師：
作為一個投資新手，你做了錯誤的投資決定！！
第一，這類槓杆基金風險較高。
第二，這類基金不適合新手。
第三，這是反向基金，大市升，佢跌，仲要有槓杆，科指升1%，佢跌2%，高風險。
提翻，無人能預測大市短期走向，巴菲特都話佢唔得，除非你實力勁過股神！
記住，我地投資不是預測短線走勢，而是進行長期的財富配置，持有優質股，長線。
第四，投資$70萬絕對不適合，我地任何股票或基金，都不應投入過資金，不能佔我地投資比重太多。
我建議你加強自己的投資知識，之後先再投資。
Q43182：
阿sir你好，我係一個退休人士，如果大約$100而家先至買入滙豐！算唔算高，因為我唔想承受太大風險，所以唔敢買科技股😅
銀行利息只有1%但係滙豐好似都有5%
龔成老師：
雖然匯豐（0005）現價未貴，但也不宜在現水平一次過買太多。
建議你建立一個收息股組合，匯豐是其中一隻，但不是唯一。
投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。
你可以建立一個收息股的組合，目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、匯豐（0005）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
3110可以視為收息股的組合中其中一員。這基金可投資的，現價合理，可分注。佢是投資香港大型，派息較高的上市公司。
這是不差的收息組合，但增長力不強。
Q43183：
請問1972是否值得繼續持有？現時差少少便返回家鄉，還有機會再升嗎？另外，3067仲差好遠才到家，是否可以再等下去呢？謝謝🙏
龔成老師：
太古地產（1972）增長力不及過往年代，但不是無質素，你可考再上多D，減部分，留部分。
太古地產是香港及中國的綜合地產發展商、業主及營運商。簡單來說分做三個部分：物業投資、物業買賣、酒店投資。
這企業現時持有的物業組合，包括香港太古坊、太古廣場及太古城中心。中國內地方面，公司在北京、廣州、成都及上海擁有六個已投入營運的大型商業發展項目。集團在香港、印度尼西亞、越南及泰國的住宅市場均擁有業務，在美國邁阿密亦有土地儲備。太古酒店在香港、中國內地及美國發展及管理酒店。
由於美元強，再加上全球地緣政治和經濟不明朗，以及中國經濟轉弱，來港旅客消費模式改變等因素影響，疫情後的復甦仍然慢。
相信在短期，這企業仍面對一個較一般的零售環境，因此財務數據及股價都未必太強。
至於3067，長遠發展力仍在，但始終科技基金風險較高，你要睇翻持貨比例是否較多。
Q43184：
9992近期下跌，有一手，應否長揸？
龔成老師：
如果一手就持有。泡泡瑪特（9992）有質素，企業是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。
佢算是中國最大且增長最快的潮流玩具公司。
合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。
不過，佢過往曾經面對中國策方面的風險，而近年業務有好轉情況，不過要留意，佢業務始終是潮流產品類，如果日後熱潮減少，都會對佢的生意有一定影響，因此，投資就不建議太大注。
Q43185：
老師，蘋果點睇
龔成老師：
Apple（AAPL）有質素，無論技術、發展、品牌、銷售網絡都十分強，是可以長線持有的股票。
佢設計了各種各樣的消費電子設備，如智能手機（iPhone）、（iPad）、智慧手錶等。而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。
蘋果有很強的護城河優勢，其中一項是來自高客戶轉換成本，再加上當中的技術、發展、品牌、銷售網絡都十分強。
除了留意iPhone等產品的銷售外，也要留意其他收入，因為智能手機只是平台，只是其中一個產品，蘋果努力擴展其他收入，同時有另一項業務，賺錢能力比產品類更高，就是服務類，蘋果正擴大 iOS生態系統的覆蓋範圍，近年對收入貢獻比例不斷提高。
投資者買入這股後，可長期持有，就算有中短期波動也不用擔心，除非蘋果的核心質素有變，否則，若果只是一些中短期問題，例如中短期產品銷售、中短期供應鏈問題、中短期研發無突破，投資者不用理會，只需耐心持有等企業成長就得。
由於已經發展得好大，之後會進入穩定的增長期。長遠的投資價值仍在，如投資要分注，長線，現價合理。
Q43186：
老師早晨，現在2800 ，3110可唔可以繼續買入？ 當存錢入銀行咁做得唔得？
龔成老師：
第一，兩隻都是有質素，可長線，現價可分注買入，但不要一次過買，不要用太多資金。
第二，股票是有風險的！不同定期！
股價始終有上有落，你要考慮自己風險承受能力，投入適合你比例資金。
盈富（2800）這是一個「平衡組合的工具」，當中有80隻成份股，對股票組合有平衡作用。同時，你預是一個收息及平穩增長類基金，雖然不是高速增長，但就適合大部分投資者。
對不懂選股的投資者來說，可以用盈富作中心，加上其他股，這就是一個穩中求勝的策略。
Q43187：
我睇左3800 的年報 長期處於虧損狀態 原因是晶硅售價低於成本 市場需求不大
最近公告會有RWA 穩定幣合作方案 但仍未正式落實 所以前景是不太明朗 如果入手前 有睇清公告 同年報 未必會衝動入 …. 哈
看看這分析可以嗎 謝謝
龔成老師︰
我未具體睇佢年報，大家講出了佢虧損主要原因，同埋是什麼導致。
另外，由於產品跌價，令到佢都生產少左。不過，而類型生產商，有好多固定成本都不能因為減產而減少，變相令到佢虧損幅度進一步惡化。
同埋，佢有一個近10億架公平值變動，而個有機會只係會計數字調整，你可以睇翻個原因。
至於RWA，其實你可以簡單咁理解，佢只係將現有產品，放上區塊鏈途徑去銷售。就算成事，只叫做多一個銷售門路，我相信唔會對佢業務有一個好大架幫助(因為銷路，始終要睇佢產品質素和市場需求)。
Q43188：
龔成老師你好, 心情有啲失落都想同你分享下
我哋上海層樓 最高峰 兩年前530萬 我哋放棄咗個買家雙手讓咗畀 樓下 我哋嘅香港鄰居朋友因為佢哋個女趕住要出市區讀書
我哋一心諗住 慢慢啦應該等多一年半載會繼續上升會繼續更加好
點知我朋友賣完之後唔夠三個月 23年底開始房價 嚴重下滑
中國前幾日開咗個大會 裏面內容 係講明要維持穩定 要在中國更多人享用到 舒適嘅房屋意思即係 價錢低人人都買到咁先至舒適
我一聽完呢個消息 再加上見到6月1號樓下同戶型 成交咗345萬
我今日的起心肝去搵agent佢叫我唔好留戀佢話上海嘅房價 非常不明朗 佢話如果我要走 係遲早嘅事 叫我盡快賣
我話 530係高峰我朋友個價其實因為係我雙手 奉送咗個客畀佢
呢一下係我成日放唔開, 到今日我同個agent講低過四百萬我真係接受唔到
鬼準坦白同我講佢話6月1號我樓下同戶型 成交345萬我高佢五層都係同戶型佢話頂多 高十萬
佢叫我 底價 360 要錢唔要樓 叫我 唔好留戀上海, 仲要話 叫我 join佢哋嘅 什麼service 喺個網上面 如果 啲客自己睇佢哋嘅平台 貝殼， 就會 見到優質 首先推。
優質筍盤的意思
咁即係話 要靠埋呢啲嘢先至有機會成交到
個經理話 如果呢個價 就反而係 市場價格 比較有信心一個月內幫我出到
我同老公一心諗住 反正都係唔好糾結三幾十萬就360萬人民幣底價賣走佢算了攞返本金然後跟你買股票
因為我哋係做 建築工作而家 香港和大陸 房地產咁差我哋做起樓部門嘅 都 驚冇公開 分分鐘 做完呢個項目就會 直接被公司cut咗成條team 即係返香港就失業被退休
我們夫婦已經50冇仔女
我老公跟 阿sir你嘅 資料 提議, 我老公 話賺咗有15%
所以我哋諗緊攞返360萬人民幣 即係380萬港幣， 買一啲 收息股以及你嘅 資訊提供的股票建議
我哋雖然返唔到嚟香港上你嘅堂但係我老公已經睇曬你嘅書, 層樓我仲未正式 放出去 希望360 買到啦 我個心希望有人再比高二三十萬啦
我呢個係眼淚嘅教訓朋友還朋友 唔能夠太好心 因為 一講到錢係一件好嚴肅嘅事
希望我哋能夠 揸住呢380萬港幣， 用2年半時間追得返100萬 。我老公話計過 如果8呢年本金加利息應該兩年半做到
佢都係跟住你嘅建議買呀佢個人都係穩陣派, 佢睇完你 又睇過 好多youtuber名家老師 甚至亦都 知道子凡， 不過佢話其他唔睇喇淨係跟你嘅頻道。
因為佢覺得你 穩陣得你又有少少進取，但係又唔會非常進取🤣， 呢個 standard佢好buy 同佢性格做管理嘅人係比較近。
但係我老公話， 「賞賜是耶和華 收取也是耶和華」。
說不定 上帝在股票方面 繼續祝福我們 比起這個 房子 的祝福更大。
我2015買入220萬， 而家如果360賣出， 減埋 75萬 供咗嘅利息 ，其實都賺咗。
多謝阿sir聆聽
如果過多一兩年真係要返香港工作 就去報名上你堂。
“賞賜的是耶和華，收取的也是耶和華。 耶和華的名是應當稱頌的”(約伯記1：21)
龔Sir, 我真係賣咗層樓，琴晚成交咗 370萬人仔，即係套返現404萬港幣。
雖然 賺少咗 幾十萬， 但係呢個時勢如果唔進取啲就成交唔到 ，套唔到現金，然後繼續 陰陰跌，可能仲衰多兩成。
因為上海呢邊 經濟真係差好多人畀人拖數連政府 都找唔到錢 畀民間啲公司，
有好多公司而家都要改返四日工，有啲甚至 3日半，都係頂住個雞頭，不過總好個裁員。
希望未來五年，好好利用呢一筆錢，跟住龔sir學習投資， 預備55歲退休。
如果能夠做到 每年有十厘 我已經 非常滿足感恩。
阿sir 我應該要 糾正，我哋夫婦目標係想用四百萬，每年收到至少15% 利息，需要喺三年內目標賺到180萬。
想聽下 龔sir意見 如何 設定策略。
這是我們 工作 最後五年的機會了， 一定要把握得好好 。
因為 我哋嘅專業，係過咗55歲，基本上就 要預備冇人請。
所以我哋要賺多接近二百萬，先可以有資格 夫婦財務自由退休。
我們沒有兒女的。
龔成老師︰
其實內地政策，都女子清晰房住不炒，唔係話D樓會無晒價值，但要用來增值就相信未必咁理想。
我地投資係有一樣野叫"機會成本"，表面上你持有物業，只係賣唔賣架考量。但實際上，如果你堅守唔賣，仲會放棄埋投資其他資產架機會。
所以，你沽出內地物業，我覺得都係合理做法。
至於退休規劃方面，用5年時間，每年平均15%回報唔係唔得，但有一定風險。我相信要你們組合一半「平穏增長股」和一半「潛力股」(而唔係集中收息，因為正常收息股，現時年息只有大約6-8%)，先大機會做到。
但以你們年紀，我一般會建議集中「平穏增長股」。因為你們隔離退休時間唔算長，如果萬一有重大錯誤，比較難番身。所以，你們要自己平衡而件事。
到5年後，如果你們累積到足夠資金，才換成「收息股」，創造被動收入去支援退休生活。
(退休支援計算方法︰如果你希望5年後每月有2萬蚊現金流，以股息率6%計，你需要本金400萬。)
以下是相關「平穏增長股」和「潛力股」，你可以以它們作目標，去長線分注或月供儲貨(記住唔好一次過入，咁係好危險)。
選股上，你可以考慮一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）。另外再加：美股如微軟（MSFT）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。
以下是有關"平穏增長股"和"潛力股"的影片，你可以參考下︰
https://www.youtube.com/watch?v=YJdE6xyUXS0
https://www.youtube.com/watch?v=u0ADUWkikhU
Q43189：
Sir, 如果想收息又做到資產增值，美股 SPLG 定係 NOBL 好些？
你會建議以 ETF + 個股的方式買美股？
龔成老師：
其實兩隻都是有質素的ETF，都可長線投資。
如果你投資目標是收息，就可考慮NOBL。
如你想增值多少少，就SPLG。
以組合平衡度及穩健度來說，利用ETF + 個股的方式買美股，是較好的。
Q43190：
老師，富途$60有貨，究竟我繼續長線持有，定還是放一半？
龔成老師：
這股在大方向上，可持有，但近期富途（FUTU）近期股價大升，主要受穩定幣及加密貨幣相關概念帶動，其實近期不少證券股也受這因素影響而上升，而作為大型證券行之一的富途，如果這類業務有發展，這股都會受惠。
如果你貨多，可減少少，留部分長線，但要平常心面對短期波動。
富途股價近期創近4年新高，回顧之前股價，在2021年開始持續下跌，當時股價下跌的主要因素，是中國監管，以及中國經濟轉弱。其實分析當中的財務數據及客戶數目，這企業業務發展一直都不差。
在2021年，中國央行高級官員表示，在中國大陸經營的跨境在線經紀公司的行為是非法的，並指出富途指導潛在的中國客戶在香港開戶，富途股價開始持續下跌。
2022年，2023年再有不同的監管。
去到2024年，中國對富途的監管已大致明朗化，富途更明白當中的遊戲規則怎樣，反而有利業務之後的發展，而投資者只要用這刻的業務情況去分析就得。
如果以現時富途業務分析，整體正面，營業額由2020年的33億港幣，增至2024年的136億港幣。盈利亦由2020年$13億港幣，增至2024年的54億港幣，增長快速。
相信未來1、2年的，富途客戶受惠海外市場，將會保持增長，之前富途宣佈，繼在美國、新加坡、澳大利亞和其他市場拓展業務後，其海外子公司會發展加拿大業務。
你可長線，耐心等業務發展，同時平常心面對短期股價。