經常聽到美國企業巨額回購，次次都幾百億以上，或多或少因為股東收息係要抽稅，咁就不如益下股東，回購股份支持下股價，相信都皆大歡喜。香港市場沒有股息稅，但近年的確係多咗公司回購，除了匯控(0005)係有全盤計劃去做派息同回購，其他的股份，做回購大多係為了托價，但至於成唔成功，始終都係要睇你的動機及質地，利福中國(2136)的例子咪成功囉，美圖(1357)咪失敗囉。
美圖去年炒到天價23.05元，當日仲話他的用戶及流量可以當飯食，雖然未有盈利，但都潛力無限，但一眾上市前已入股的股東，創投常客IDG及IT界猛人李開復，全部都在招股價以上食糊，最頂癮係美圖創辦人蔡文勝之子都有份減持。可能股價的確低殘，蔡文勝在去年底開始增持，由10蚊買到8蚊，5個月內動用了2億元，不過之後就停手了，用公司的資金開始回購，由5月至本周三，用了7億元買入9786萬股，由第一天出手計起，現時股價已腰斬，非常悲壯，不過寧用7億元回購都唔派息，股東應該死心吧，依家你就明點解5月開始老細不再用自己荷包啦。
IGG(0799)亦是另一愛回購的科網股，由15年起已回購1.33億股，動用了9.3億元，不過IGG係又有特別息又回購，相對上正面好多。不過以出手的力度計，15年至17年初都係輕輕力，至去年炒爆咗，8月業績後先開始重手回購，9至12月期間買了2910萬股，用了2.5億元，股價在這段時間係由11蚊開始反覆跌至7字頭。今年4月開始再出手，至8月期間已買了3912萬股，涉資4.2億。明顯地，今月業績後力度收歛咗，之前6月在11蚊都單日大手掃7百萬股，但今月股價兩度跌穿九蚊，累積都係回購了1163萬股，究竟係對前景轉審慎，定係諗住留定子彈穿九蚊先再買，遲下就知。
舜宇(2382)上星期因業績遠遜預期而暴挫，當天亦係公司上市11年來首次進行回購，不過只係撈咗15萬股，價值千二萬，同佢過千億的市值相比，九牛一毛，究竟公司只係手痕托價，定係有心持續回購，相信要再見低位先睇得通。
前輩教落，話科網股有資金都拎去再研發啦，點會去派息，但時移世易，係唔派息呀，但子彈卻用在市場托價，你話係唔係好事呢？
Fb個人專頁 http://www.fb.com/chingbing888