「今日吾軀歸故土，他朝君體也相同」用這個來形容下半年首個星期的市況，真係十分貼切，點解呢？當大家認為今次跌市係關貿易戰事，結果就由貿易戰關連股，慢慢擴散開去，唔關事的股，逐一染病，大股率先收檔，跟住今星期指數跌下又彈下，但二三線股份就全部中毒，尤其是升得多的股份，今個星期真係乜都還晒，所以話他朝君體也相同，真係好有feel啊。
還記得十年前的大牛市，四叔成日在傳媒度指點江山，派股票貼士，有一句青冰係特別有深刻印象的，大意係話跌到面青時就差不多見底喇，可以入貨，呢句野好有相反理論的意思，都係別人貪婪時我恐懼，別人恐懼時我貪婪，這個面青及恐懼的情況，在今年二月時曾經出現過，當日有買貨的，似乎曾經小勝一仗，但近日的市況，跟二月時有點不同，也許要更加小心的去拆解。
在二月爆煲之前，主力帶旺個市的，都係平保(2318)、騰訊(0700)及港交所(0388)，其他板塊都有炒作，但未足以成為市場的焦點，二月個浪一退潮，其實大家可以看到，平保及港交所已經冇力再創新高，即使及後有同股不股權的落實，及分拆好醫生(1833)上市，都完全帶唔起佢地，而個指數亦都冇再創過新高。跟住的幾個月，由於北水開始撤退，大股無晒火氣，接棒的就是醫藥股及教育股等等，可謂升到你唔信，這個情況持續到六月初，佢地相繼創晒新高後，大市的壞消息愈傳愈多，本身對這些強勢板塊無關，但足以令佢地見頂回落，而踏入六月尾七月初，就更加首當其衝，全線被沽售。
這個時候大家(包括青冰)都會問，究竟咩事呀，跌到不似人型，青冰雖未至於係老餅，但都見過唔少類似的市況，傾向相信現時係流動性收緊後引發的沽售，簡單啲講就係派對完結後的混亂，係呀你花啲時間慢慢執番個地方，過幾日的確可以開個細啲的party再玩，但在慢慢執這個階段，的確可以好恐怖，周圍都係玻璃碎，呢個時候去執野，好易整損手，兩三次之後，真係會面青，如果你音樂未完已經瞓咗係度，反而無咁驚，因為你近日一定暗喜，哈哈你班友終於黎陪我喇。
青冰在上半場末段打得好，半場領先，也直接令面青指數偏低，有防備就冇戒備，慶幸就係有點防備，未至於嘔突，無計喇，時勢唔好，愈分析愈做功課，就只會愈見鬼，少做少錯，安心去旅行吧。
P.S. 由於未來兩星期外遊，本欄將暫停兩周，7月27日再見。
Fb個人專頁 http://www.fb.com/chingbing888