大市自一月見頂，至今已經十個月，由年初九成人看好，至現在差不多過半人看淡，有戰友話現在點止過半呀，起碼八成啦，anyway，看淡都肯肯定係主流，即使貿易戰可能很快傾得成，究竟是否當無事發生過，炒番上三萬點呢？相信都唔易。
看好看淡，自然都會有一大堆理由，每當有自己陣營的消息出現，定必先自high再瘋狂share，都係人之常情嘅，例如你多年睇淡樓市，出現二手劈價，一手賣唔出，梗係開心，去年已經覺得騰訊(0700)太瘋狂，今年見佢狂瀉，即使自己冇沽空，感覺都像賺大錢般。而好友淡友，更會特別注視美股走向，早幾日道指跌六百點，淡友在港股未開已經開定香檳，心諗今次仲唔穿底？結果港股低開後一直向上，淡友又一場空歡喜。
股票市場要理性分析，相信大家都認同，但最弊現時社交媒體發達，市況白熱化，好容易就壁壘分明，但同對手刀來劍往幾回之後，最後只會發展到為拗而拗，著眼找對方的謬誤，而忽略了自身的盲點。其實個恆指，唔一定要上六萬點，又或者要見九千點嘅，中間仍會有不少變數及機會，正如青冰早前講過，炒股不炒市永遠都存在，只要不是極端的市況就OK，就以今年為例，跌足11個月，當中仍有兩三個月小陽春，要好似去年咁有個明確概念，強勢股升完再升，下下食爆棚清一色，應該就好難，但如果做定功課等待機會，偶而食三四番，還是可以的。
減少落場，調整心態，應該是未來幾個月的主調，工業界成日話，中港經濟要過咗農曆年先見真章，持盈保泰定keep住打游擊，悉隨尊便，只要不斷提自己，現在不是2017年啊。
Fb個人專頁 http://www.fb.com/chingbing888