大市今星期可謂相當嚇人，以恆指計，雖未出現過單日跌千點的場面，但星期一的教育股，星期二的舜宇(2382)，之後的醫藥股及星期三收市後的騰訊(0700)業績，夠晒驚嚇，比較印象深刻的市況發生在星期三，真係乜鬼野板塊都洗，只有一些公用股逆市升完又升，同埋幾隻藍燈籠如中移動(0941)，避險情緒高漲，呢個時候一定覺得揸住穩陣股好啦，兩電一煤一領展(0823)，好明顯係有些先知先覺的基金在上月已在其他板塊獲利，在沒辦法揸太多cash的情況下，唯有追逐破頂的公用股，如果市況持續地曳，放在這裡應付贖回潮屬上策。
散戶總覺得基金好勁，但其實唔少基金都有自身的mandate，有邊啲買得邊啲唔買得，現金水平的高低有限制，個別股份或是行業也不能太過集中，亦唔係每個基金都可以用衍生工具為自己的持股對沖，牛市旺市梗係冇乜問題嘅，仲可以合埋眼人買我買，只要唔跑輸畀個指數就得，但踏入熊市，以上種種就變了綁手綁腳，斬唔斬已經係頭痕，斬完要買番啲乜亦都好煩惱。
散戶的靈活性絕對比基金高，至少你看不清個後市，可以沽貨，即使現階段冇乜心水，咪cash is king先囉，唔需要向其他人交代，甚至你拎去做3個月定期都冇所謂。去年恆指升三成半，跑贏此數的散戶大有人在，今年就回吐了一成，兩年加埋都仲有賺吖，但如果你兩年累積回報係見紅，深信你操作上都有好大問題，應該清倉再作檢討。
青冰上星期在fb專頁中提過大家，當時有強力反彈，要把握時機打番啲爛牌出去，究竟有冇做到，有冇做得好，現在心裡有數，如果不幸地，上星期手上的爛牌是有增無減，都唔緊要嘅，仲有好多反彈機會，在乎你幾時先會信。
青冰以往都經常提及「嚦咕嚦咕新年財」呢套戲，因為入面金句多，尤其是面對逆境的時候看，真係好值得細味，還記得麻雀俠劉華啲運仲未番黎，手上成手爛牌，Gigi就叫佢推牌啦，但劉華就沉著應戰，慢慢砌番好自己副牌，即使最後知道食唔到糊，但都要好用心逐隻牌打，務求最後輸少當贏，我地成日話趁反彈沽出，都係這個道理，係就係蝕，但蝕少咗好多，都開心架嘛，係咪?