這星期阿爺放假，股民的焦點都放在恆指三日跌了千一點，但美股又屢創新高，離岸人仔價一度跌穿6.90，不過更值得留意的是，美國10年債息已俏俏地升至3.23%，是七年高位，全因聯儲局主席鮑威爾星期三晚放鷹，話美國經濟強勁，或需加息至中性以上水平，所謂中性水平，就係聯儲局的利率目標3.50%，換言之係要加多1.25%以上。
每逢債息升，在美國的金融股就特別醒神，這星期也是跑贏大市，推道指創新高，咁香港的受惠股，很自然就是匯控(0005)，所以你見到佢今星期雖有跟跌，但都跑贏大市，昨天市況續弱，佢仲倒升收市添。大笨象今年股價暫跌14.8%，如果計番啲股息，今年都係跌一成，表現只算中規中矩，在成份股中，比不上三桶油及公用股，連個仔恆生(0011)都完勝佢。
在加息周期，傳統智慧銀行股是會受惠的，不過今次的加息來得比較慢熱，由2015年底聯儲局開始加息後，2016年差不多整年按兵不動，去年6月加完之後，又有半年的冷靜期，予人加下停下的感覺，究竟美國經濟頂唔頂得順呀，來到今年，股勁經濟好，加息步伐開始加快，之前長期企唔穩3厘的十年債息，也終於訓醒破位。本港去到上星期先首次加息，由於幾間大銀行仍然水浸，加0.125%絕對係應酬金管局，講真你日催夜催真係好煩架嘛，不過亦係因為加得唔多，之前吹到好勁的加息有利銀行股，兩三日就急急回吐了。
作為本地銀行，恆生及中銀香港(2388)在存款及按揭貸款上，應該相距不遠，股息率亦係相若，財息回報黎睇，恆生今年係升10.3%，中銀跌6.5%，大笨象拍埋去，真係差啲，話晒自己股息率5.8%，又有大額回購頂住，今年都要跌一成。不過債息上升，或會帶來楔機，匯控比兩者優勝的地方，就是有美國業務及財資市場炒房規模大，近年聯儲keep住加息，仍無法將長息引導上去，搞到條yield curve咁平，炒房冇肉食也，所以長息向上，有利美國金融股，匯控亦應同步。現時港股疲弱，對於匯控來說是壞事，因為會被拖累而跑輸畀美國同業，但對恆指可能是好消息，因為終於有隻重磅股稍為「對沖」騰訊(0700)，有隻大象頂一頂，應該會跌得慢啲呱。
Fb個人專頁 http://www.fb.com/chingbing888