半新股近期熱炒，你睇中煙(6055)兩星期就升1.4倍，翰森制藥(3692)亦升了五成，但其實佢哋都係較大市值嗰一批，反而表現更強，似乎炒大唔炒細係半新股的主旋律。去年9月上市的美團(3690)，昨天也破位而上，唔經唔覺已經上返招股價附近，一隻市值近四千億的股份，今年已累升56%了。
普羅投資者對同股不同權的W股，都是負面印象居多，可能是小米(1810)拖累吧，但其實美團去年都勁蝕千一億，成為史上蝕得最勁的港股，主要是可轉換優先股的公允價值變動所致，如果你是基本分析派，這隻股肯定買唔落手，但中金發表報告唱好，目標價睇83蚊云云。
美團上星期五的成交達98億，沽空金額有39.8億，有大撼大feel，近40億沽空係唔係想做世界呀？其實上周五係美團被納入富時指數之日，單是收市競價已經76億成交，可能當日有不少空軍，睇死指數基金買完後，會無以為繼而大跌喇，點知昨天急升6%，應該挾死唔少淡友，翻查當天的沽空加權平均價，係64.29元，換言之依家輸緊4蚊喇。
假如美團唔係W股，相信以其市值及成交，已經入咗恆指，不過現時恆指服務公司還未對W股加入恆指作諮詢，所以半年內都難成事，但由於阿里巴巴亦將會以W股的身份登陸，相信要檢討W股的日子不遠矣。而恆生綜合指數，早已將美團及小米加入，只係內地對W股仍有些戒心，暫時唔放在港股通之列，不過去年底已經話傾好咗，最快在今年下半年納入，亦即係話，七月開始已經算係下半年啦，但你又唔好咁興奮住，因為仲要落實細節及公佈的，唔係話今天公佈，明天就可以生效。
公允價值要撇的賬，相信今年不會復見，絕對會令份業績靚仔啲，但今年要扭虧應該仲未得，現時爆升的最強動力，應該係那40億淡倉，及北水何時正式買得，後者冇得估，但前者是有數得計，上周五有40億沽空，但今星期一至三的成交總額只有28億，當全部買盤係空軍平倉，都唔夠吖，所以昨天挾淡味極濃，今日或者仍有餘波，要突破上市新高都唔奇，但如戰友要衝入場，務必擺定個上蝕位，到價即斬喇。
Fb個人專頁 http://www.fb.com/chingbing888