大跌市所有股票都好似有毒咁，但其實都會為高估值的股票吹走泡泡，未嘗不是好事，但大熊市中，估值低殘，或者會誘使大股東做嘢，將公司私有化都唔定。
冷門房託股春泉（1426）近日突然變得鬧哄哄，事緣持股約14.8%的太盟地產，上月底「突然」提出現金要約，每股要約價4.85元，較消息公佈前溢價逾六成，帶動股價一度搶高至4.3元，近日在大跌市下，仍繼續於高位徘徊。
用得「突然」兩個字，當然有原因，皆因太盟地產早已不滿春泉股價表現跑輸大市及同業，更於去年提出罷免管理人，但最終未能獲得多數股東支持。今次觸發太盟再做嘢，相信與春泉宣佈收購惠州商場項目不無關係，是故太盟要約過關的兩項條件，其中一項就是惠州交易不獲通過，另一項則是要約須取得逾五成股權。
未知是否去年罷免一役慘敗而回，今次太盟地產出手極闊綽。春泉上市近五年，歷史高位為3.91元，意味今次出價，較歷史高位還要有逾兩成溢價。如按以過往分派紀錄計，更需要坐定定8年才能收回今次要約的回報！小股東以往眼見領展(0823)日日升，春泉就低位自憐，嗰種感受一定好酸，加上現時大跌市，現價仲有25%潛在利潤，接受要約實屬正常，不過要記住在月底的股東大會投反對票否決惠州交易，否則要約隨時泡湯，冇咗全購金身護體，股價好大機會打回原形；如果覺得搞咁多嘢好煩，簡單啲，就即刻沽貨獲利，袋袋平安吧，冇理由同錢鬥氣啫。
Fb個人專頁 http://www.fb.com/chingbing888