青冰以往很關注百盛(3368)，源於兩年前公司賣物業套現逾20億人仔，以常理推測，應該會派特別息跟股東分享成果，加上那段時間阿里巴巴四出收購內地實體零售，話唔定百盛都可以憧憬吓，那些年的確有炒作過，但特別息就欠奉了，跟開青冰的戰友，都知道他們愈來愈多古怪動作，對佢真係180度改觀。今星期公佈了第三季業績，趁市況靜冇乜嘢寫，不如又再溫故知新。
兩年以來百盛只派了5仙息，折合大概1.3億人仔，咁啲現金去咗邊呢?按剛公佈的季度業績，佢哋有14億現金，4.7億定存，9.9億保本投資存款，4.5億金融資產，仲有13億定存係放在非流動資產類別，即係超過12個月的定期，季績亦好體貼，唔避忌咁幫大家計埋出來，共有46.5億。
有現金唔一定要同你分，這個在港股市場見慣不怪，但你坐擁大量現金又唔去還債，就相當有趣了。他們有5億美元債於今年到期，有cash去贖回減債減利息開支，好正常吖，但佢地就同北京銀行借錢，去贖回呢批債，當中有些是借美元的，利率係三個月LIBOR+2.05%，三個月LIBOR今年大部分時間在2.4%，係近月先升至2.6%，換言之百盛的利率就是4.45%至4.65%。青冰不厭其煩搵份年報睇睇，發現大部分的保本投資存款，都是以人仔為主，息率在1%至4.5%都有，在8月公佈的中期報告睇到，公司預期全年回報約3.35%。
如果你心水清，應該會睇得到借貸成本個息率，係比保本投資的高，雖然唔知佢地的定存回報率有幾多，但可以預計高極有限，因為在半年業績內，融資成本凈額係負2350萬，即係利息支出比收入高，而剛公佈的第三季業績，融資成本凈額係負1998萬，一季已經差不多等於上半年，符合利率向上的走勢。投資界常說借低息貸款去買高息產品，是為利差交易，咁百盛呢一招，應該可叫做反向利差交易了。
行家金鷹商貿(3308)的老細揸住14%百盛，有可能係搞咁多古靈精怪，唔善待股東的主因，百盛主席鍾廷森本身係大馬富豪，公司派息多寡，股價表現如何，似乎唔太希罕，投資價值真係欠奉，但對青冰最大的意義係，每隔半年又可以寫一次囉，哈哈。
Fb個人專頁 http://www.fb.com/chingbing888