港交所今星期突然煞停企業版同股不同權的諮詢，青冰都要用咗半個鐘搵料，先知咩屬於企業版，同小米(1810)的個人版主要分別係，同股不同權會在個人股東在退休、辭任或身故後，便會取消這個特別投票權，企業因為理論上係永續的，所以之前的初步諮詢，都有談及日落條款。證監會有董事在4月時已經表態，話同股不同權本身係想保障創辦人對公司的貢獻，如果擴展至企業版，擔心會被濫用及成為市場常態。
本身個新聞都唔係好爆炸性，但反而股民的反應就幾得意，青冰無深究過咩原因，但知道小米的確係犯眾憎的，基本上無論佢有咩新聞，主流意見都好想佢死，一切都由負面出發，跌穿招股價、MSCI唔會納入佢、港股通唔受佢玩，股民都係抱著幸災樂禍的心態，今次煞停企業版，大家亦認為港交所(0388)夾硬益佢送佢上市，之後就落閘了。
客觀分析，當然唔係落閘啦，因為係另外一樣野來，但港股通唔受佢玩，應是加強了港交所煞停的理據，反正認受性仍低，何不應市場及證監所需，暫緩一下呢，為同股不同權消消怨氣都好吖。投資路上，最忌就係睇一啲自己想睇到嘅野，阻礙自己客觀思考，意氣之事一時三刻沒有問題，如果成為習慣就較危險了，記著有soundbite的野，可能幾易入耳又有趣又爽，但未必是真相，更加未必會幫你賺到錢啊。
國內的大型科網企業，唔少都會用同股不同權去保持自己的控制權，騰訊(0700)旗下的騰訊音樂，早前就係傳想用這個企業版，在港申請上市，但在7月8日就發通告表示，將赴美國掛牌，似乎一早已經收到風，企業版要有排等呀。最令青冰感興趣的是，騰訊在本港投資市場是寵兒，粉絲眾多，如果當初企業版跟個人版同時落實，騰訊音樂用特權上市，是否會引來同樣程度的劣評呢? 青冰偏向相信同人唔同命，對人不對事多啲喇。順帶一提，高盛係騰訊音樂的保薦人之一，而高盛亦係當初企業版初步諮詢時，全力支持的重要一員，所以話股市嘅野，銀包決定立場，是常識吧。
Fb個人專頁 http://www.fb.com/chingbing888