金槍不倒的美股，在踏入十月後終於抵不住地心吸力，在周三晚的跌市後，道指及標普已在2018年見紅，最後戰士納指仍有3%升幅。港股令人心灰、A股令人心死，應該是今年的市場共識，轉戰美股，甚至走進日韓市場，令人趨之若鶩，點知一個浪打埋黎，證明環球市場同氣連技，若然未報，時辰未到也。
侵侵成日將指數掛在口邊，十月的大跌肯定令佢不爽，咁當然就會拉人落水啦，聯儲局就成為罪魁，加息收水太快令股市下跌，普羅市民一聽就明，轉移視線話咁易，最重要係，聯儲局主持不會還拖同你打泥漿摔角，有侵侵講冇人講，隻鑊就你孭啦。中期選舉臨近，民調指共和黨都係危矣，究竟輸咗之後侵侵會收歛啲定再癲啲，呢個不明朗因素，都足以令大家先行獲利吧，之但係，無論係咩原因，都冇辦法證明，唯一的事實，就是3大指數已從高位回吐9至13%。
弱過藥煲的中港股市，遇著美股急跌，無論是好友淡友或中性的朋友，都肯定認為我地凶多吉少啦，點知上星期國內四大財金官員喊話，再加幾個特別的措施，令A股離奇的強，雖然唔講得話好叻，上證都係2600點之嘛，但如斯環球氣氛底下，已屬萬幸，有阿爺照住，港股昨天雖然穿底，但有15隻恆指成份股係升喎，早前的藥煲股內房及醫藥股，昨天都低開高收。
說現時見底肯定言之尚早，但想在股市生存，一定要保持清醒的頭腦。現時個市況，問十個人應該有九個說離底尚遠，還有更壞的消息尚未浮現，但這不應該成為你判斷市況的理據，當然你又唔好相反理論上身，斬釘截鐵話個個睇淡就應該見底啦，留意返個個睇淡應該有兩個幾月了，結果我地都仲係跌多兩千點。青冰想指出的是，我們做功課或作判斷，唔應該受身邊的人影響，呢個當然係難啦，但適當的抽身，或者看到更大的畫面，如以上說的內房及醫藥股，近月真的很弱，但如果佢地持續地遠離低位，又是否正給予我們一些訊號呢?
恆指見萬八點，美股進入熊市，匯控(0005)會跌至8、9厘息，聽落係好恐怖，但年頭話恆指四萬點、騰訊(0700)見一千蚊，現在回想，恐怖程度都不相伯仲啫。
Fb個人專頁 http://www.fb.com/chingbing888