來年的經濟會點，相信大家都約略感覺到，貿易戰從3月擺上檯面，至今已超過半年，傳統智慧說，股市走在經濟之前，這個效應通常有6至9個月的滯後，雖然恆指現時代表中國經濟多於本港，但兩地關連性咁大，仍算係很可靠的指標，恆指從今年1月見頂，至今已經9個月，對實質經濟的影響應該開始浮現了。不過，上文所指的大家也感覺到，泛指係有睇開股市的戰友，對於唔炒股的普羅大眾，你跟他說下年會好艱難，佢應該會話你杞人憂天。
早兩個月，大家仆崩鼻去爭一手樓，無論幫子女置業係出於真心，還是人頭避稅，都叫做萬人空巷呀，但近幾星期頻頻聽到二手樓劈價，幅度驚人，氣氛真係轉得好快。新地(0016)作為業內龍頭，股價率先於1月見頂，現價已從高位跌了26%，如果這個會反映在未來6至9個月的二手樓價，都幾嚇人，不過，只要你炒過股仔，就知道甚麼叫乾升，成交少，但可以日日創新高，不過反轉豬肚，乾升後急挫，亦同樣容易，因為持貨者獲利豐厚，殺價沽出袋袋平安，好正常啊，至於可否套用在樓市，日後便知。
零售市道，睇佐丹奴(0709)及莎莎(0178)似乎有點啟示，兩股都在6月見頂，同在本周創新低，累積跌了32%及44%。當莎莎在8月中時破位向下，青冰已有點擔心零售股是否確認轉向，當時跟分析員朋友談及此事，他表示剛跟某大REITS的管理層會面，對方指對零售市道十分有信心，租金仍有升幅，兩個月過去，未知那管理層當天是有心誤導還是判斷出錯，相信現時都要修正一下預測吧。我們亦可以參考自由行龍頭股九倉置業(1997)的走勢，本周三曾跌近上市後最低位，而見頂的時間在5月，似乎同零售股走勢相當吻合。
金融業是否景氣，睇個指數同成交都知道，青冰亦唔需要加多腳喇。講到呢度，地產、零售及金融都唔掂，本港經濟應該難搞，但願市場先生只係杞人憂天，否則勒緊褲頭，可能是來年的主調。
Fb個人專頁 http://www.fb.com/chingbing888