在市況差的時候，多作嘗試博反彈並非青冰杯茶，當中給你摸個靚底買中了，自我感覺良好又贏牙骹，但逆市操作你的注碼不敢太大，即使贏了都係爽皮而已，何不留待轉穩後先入市，價係冇咁靚，但贏了安心，注碼也會較大，拉勻黎睇同撈底相差不遠。趁反彈減倉，不貿然撈底，好似又消極咗啲，但如想積極一點，都可以繼續刨通告，尋找一些目標股份，如果因市差而令佢地跌過籠，就可迅即入手。
通告之中，高層或董事變動，是較沉悶沒趣的一part，但有些時候，亦可看到蛛絲馬跡，令你更了解該股的動向。台資東森跟自然美(0157)控股股東簽訂不具法律約束力的諒解備忘錄，出價0.9元收購51%股權，單刁的細節不是本文探討的重點，反而係自然美在7月9日宣佈CEO辭任，而只係委任COO做代理CEO之職，COO通常都係做營運，CEO就係領導決策及對外的，當然由做營運的頂上CEO並沒問題，現時蘋果的領導Tim Cook正是由營運總裁升上黎，呢幾年仲run得唔錯添。而自然美，通告上用上代理二字，似乎帶著臨時及過渡性質，或者當時CEO已知道，賣盤成定局就走人，而公司都唔想咁煩再請人，就搵現有人手頂住先，反正都賣喇，事後孔明睇，又似喎。
和電(0215)原CEO胡超文將調任為長和(0001)旗下的3 Indonesia總裁，但仲會兼任和電的聯席副主席及非執董。講起和電，相信大家仲會吼住佢手頭95億現金，博佢會派特別息，上月底公布業績前曾經炒上，唔知係咪為特別息而來，最終佢地再次失望喇，但如果你心水清，管理層曾經講過一年內冇合適投資先至派，過咗六個月就估佢會派，似乎天真了一點。坊間唔少評論都認為佢地最終會派，但仍有談及今年佢地好多發展，包括同阿里巴巴的新合作，及未來5G的發展，講真都有點自相矛盾，有咁多野發展，派的機會更少啊，留意番上文胡先生之調任，或者係有伏線，話晒和電係電訊公司，如果將長和賣旗下印尼或整個亞洲電訊業務畀和和電，都屬合理，昨天長和公佈業績，見到印尼電訊業務增長好勁，如果和電買到都係好事，不過按理要搭埋豬頭骨，食埋唔太賺錢的越南及斯里蘭卡，至於係唔係咁，最多半年就有分曉。
Fb個人專頁 http://www.fb.com/chingbing888