相信戰友們都會同意，今年的股票市好難炒，來到上半年的最後一個交易日，仲保持到正數，認真唔簡單，因為執筆之時，日經、恆指、國指、道指、上證及歐洲各大主要指數，都係負數，只有標普及納指仍然正數，兩者仲未要輸，全靠科技股巨頭力撐。
回望番上半年，容祖兒名曲心淡的一句「來回地獄又折返人間」真係貼切到極點，一月全個月都升，真係升到你唔信，平保(2318)、騰訊(0700)及港交所(0388)三大火車頭，帶著大家破完又破歷史高點，青冰還記得當日的看淡的人，以超買，極超買去形容恆指及各重磅股，大家都估唔到，最後引爆的事件，係美國VIX的衍生工具引發的小雪球效應。
黎到六絕月，其實同一月的情況剛好相反，大部分時間都係跌，超賣再超賣，跌到你唔信，唔講可能你唔會記得，我地月初時恆指係31521點，即係已經跌了三千點，這個星期，上證及國指已先後從高點下跌兩成，鬼佬稱之為步入熊市，侵侵同阿爺的貿易戰愈來愈似真打，阿爺就以人仔貶值來還擊，可憐那些今年升到爆廠的航空股及內房股啊，全部瞓低晒，無計，全部都係重債股，仲要係美元債為主。
炒股不炒市一向是青冰的信仰，但現時正處於收水時代的初期，早前愈升得勁的股，現在就變了提款機，因為現價劈落去，仲大把水位。這幾天跟戰友傾談，大家都忙著減倉，將持股數目減少，收窄戰線，因為現時人心虛怯，買盤唔多，遇上你嗰隻股係有人做孖展按倉，call孖展被斬，沽盤沽極都有，但無論你點search消息，其實都係搵唔到的，最後，就入晒落侵侵度，最衰都係貿易戰啦。
青冰相信現時的跌市，係由流動性收緊引發，氣氛差買盤少，所以甚麼有概念有前景的股，一樣唔掂，實在唔需要介懷點解好股都要被洗喇，現在可做的，就是將看好的股份mark低，仔細分析佢的業務有冇受貿易戰影響，盈利是否仍處於增長周期，有冇盈喜會跟尾，因為半年結了，幾差的市況，還是要向前炒，只要公司在8月交份靚的中期業績，重拾升軌只是時間問題。
Fb個人專頁 http://www.fb.com/chingbing888