貿易戰唔經唔覺都打咗半年，不過馬雲話要有心理準備會打廿年喎，大家可能會當佢講笑，但關稅並唔係新鮮事物，一直都有，只係近年慣咗自由貿易，先至覺得陌生。其實打貿易戰會唔會令美國有實際經濟得益，相信侵侵都未必計得到，但這個手法容易明白，你地啲野太平入口，加稅令本地產品有番競爭力，保障本地就業，對於作為侵侵支持者的藍領及本土派人士，聽得明又冧，如果日後再向富人加稅去濟貧，民望更穩都未定。
貿易戰三個字的確係好使好用，包括分析本港股市，都可大派用場，今年恆指一度由高位跌去兩成，即使以年結計，暫時都仲係跌8%，到年尾要做總結，問個市點解跌咁多，一定係貿易戰累事。係嘅，尤其近幾個月，每當侵侵有tweet，又或者傳出大家有談判，個市自然跟住上落，點可能無關呢。
轉睇些數據，截至昨天收市，恆指下跌2441點，當中領跌的是騰訊(0700)，貢獻603點，匯控(0005)佔312點，吉利(0175)佔202點，中人壽(2628)佔155點，瑞聲(2018)佔133點，石藥(1093)雖然6月先加入，但都迅速為指數帶來115點下跌，以上六位師兄合共1520點，已經係六成的跌幅。好，青冰再問你，騰訊今年點解跌呀，相信戰友們都講到唔少理由，南非股東首次批股食糊，遊戲收入增長減慢，阿爺重點打擊沉迷打機，甚至你話劉央買咗，或受大師的十二道金牌寵召，都冇問題，但就應該理解，似乎同貿易戰關係唔大。而以上六位師兄當中，要講受貿易戰影響，瑞聲應該最直接，話晒蘋果係主要客戶嘛，但總體來說，恆指成份股受貿易戰即時及直接影響，相對較低。
反而內地的政策急轉，係其中一個較難令人理解的原因，或許是跌市的原兇。限打機係其一，另外藥股及教育股，本為熱炒股，都同樣受到政策整頓，前者更加不止一次，石藥及中國生物製藥(1177)分別從高位跌了38%及47%，甚多基金傷亡慘重，但你問番散戶啲藥股咩事，三言兩語難講得明。
貿易戰的確會影響投資氣氛，長遠而言會影響經濟活動及個別行業，環環緊扣，始終都會影響到大圍嘅，但個藉口用得太多，慢慢變成「個市點走要睇外圍市況」，咁就乜都唔使分析了，若要日日跟侵侵的tweet去買賣，不如花多點時間研究內地政策轉向好過啦。
Fb個人專頁 http://www.fb.com/chingbing888