龔成大哥，小弟29歲，係專業人士，月入7萬幾。買了股票一年幾。除了大概150萬現金，資產有大概30萬股票，詳情如下：
- 3000股 盈富基金 (月供$8k)
- 2500股 大快活 - 見它低少少就買，買它的公司形象和管理；但擔心其行業的激烈競爭。
- 2手港燈 - 見它低少少就買，後悔買得太少。
- 港交所，長建 和地鐵。
- 不足1手匯豐(月供$2k) - 有d後悔，質素好似一般，係因為預計利率升幅而買的。可以再來過的話會寧願買恒生。 一直有留意 領展、中電、煤氣、港視，但現價不平。除了月供部分，買其他股票都好似買閃卡咁隨心所欲，冇乜紀律。想睇睇成哥對小弟資產配置有咩意見。
呢年股市跌左唔少，成個倉跌左1萬，但股票都係諗住長期持有，最少呢5年都唔會賣。
短期都唔諗住買樓，但就驚股票價值升幅會趕唔上樓價升幅，唔買樓好似好吃虧咁。
小弟終極目標係唔計層樓，都有500萬以上股票資產，以generate自己生活費，達致財務自由。我以上的投資策略，尤其係月供部分係咪太過保守？
如蒙惠告，不勝感激。
個案重點： ‧29歲 ‧月入$7萬 ‧擁$150萬
重點目標： ‧$500萬以上股票資產 ‧財務自由 ‧短期不打算買樓
龔成老師分析：
你本身的牌面幾好，只要做好理財，同埋提升投資知識，將來財富的增長會好可觀，$500萬並不困難。
你現時的持有無問題，這些都是優質股，都適合持有及長線投資。至於你現時留意緊的股票，都是有質素，可投資的，只是你未掌握到平貴與投資策略的問題，以至你有點亂。
從整體來說，你現時有現金$150萬，股票$30萬，股票部分偏少，你可以再投資更多在股票裡。以你的年齡，可以投資「平穩增值股」+「潛力股」，後者佔比較少。
如果你未有企業估值、衡量平貴的能力，就以月供式模買入，以不斷儲優質股的概念去投資就得，例如每月月供$3萬，不斷儲股票，建立一個平衡的組合去月供，不理短線，長期進行就得。
雖然你這刻賬面跌左$1萬，但如果你用長期資產價值去衡量，根本完全唔洗理，長線投資是唔理中短期股價的，相信，近期股價回落，股市比之合理，可說是一個合理的投資機會。
至於追唔追到物業，這刻物業的租金回報率只有3%，投資收息股的股息率則有5%，我地已經可]以簡單理解，投資物業這刻的價值有限，應該先投資股票，再用增值後的股票去追樓市，咁樣會更有效率。
由於你本身資產不算少，只要好好運用，會對你的財富有好大影響，建議你努力學投資，在選股、企業評估、企業估值、投資時機上努力下功夫，將來財富可以滾存到好可觀。
龔成老師簡介
‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者 ‧ 《經濟一週》理財真人Show 節目擔任致富教練 ‧ 曾接受港澳多個傳媒訪問 ‧ 過往於銀行從事投資相關工作多年 ‧ 曾在萬多元月薪狀態下，憑股票累積數百萬財富 ‧ 現為全職投資者，擁過千萬財富 ‧ 於網上分享投資心得，瀏覽量過百萬，為人氣博客，解答網友理財問題逾15,000條 ‧ 《經濟一週》、《華富財經》專欄作家 ‧ 擁財務學學士學位 ‧ 證券業持牌人士 ‧ 股票課程導師，香港及澳門學生人數逾2,000人 ‧ 過往10年投資成績，過半能獲利超過1倍以上
Facebook 專頁「龔成」粉絲人數超過150,000人