昨天在報章專欄提及過九倉(0004)，昨天亦出了業績，核心盈利跌9%，派息比率約27%，青冰比較關心的股票投資，佢地都係草草幾句，不包括持有25%綠城中國(3900)權益，現持有290億港元的上市投資，「是一個主要由藍籌股組成的組合，具長線增長潛力及提供合理股息回報，該組合整體表現與市場相符，相對集團總資產而言每項個別投資並不重大。」換言之就係唔想披露太多，你信我地公司的眼光就得喇。
與市場相符，可以理解為同恆指差不多，恆指上半年跌了3.3%，但當中有派息的因素存在，扣埋股息都係跌1.5%，唔算太差，而嗰25%綠城，計埋息都有7%回報。至於提供合理股息回報，又可以幫佢計下，按業績第26頁講，投資股息收入有2.9億港元，而綠城派息0.2人仔，除息當日兌港元匯率係約1.2，換言之持有綠城就收咗1.3億港元，好喇，即係餘下近300億的投資，上半年派息只有1.6億元，即係上半年的股息率係0.55%左右，是否合理，真係見仁見智。
管理層在3月講過，投資股票都係以新興經濟為主，今次再補充係以藍籌為主，咁恆指當中，屬於新興經濟，相信只有騰訊(0700)及平保(2318)，充其量可以計埋瑞聲(2018)及舜宇(2382)，咁佢地的確派息係較少，以斷估精神黎睇，應該係買咗呢啲啦。
九倉去年分拆時，係講過想優質資產充份體現價值，咁九倉置業(1997)自分拆起，累積都升咗一成，在2018年50隻恆指成份股中，更加排第11位，非常叻仔，但作為九倉的長期股東，你又有冇受惠呢?九倉去年8月宣布分拆，翌日便急升14%，收報79.65元，亦是2017年的收市最高位。11月時落實一送一，各位股東免費獲得九倉置業，換言之，現時將兩者的股價相加，就可作比較，以昨天的收市價計，是81.15元，換言之為各股東增值了2%。但如果你貪九倉有大幅折讓，甚至像年初相信花旗話會私有化的話，相信你會好失望，因為九倉今年跌了8%，跑輸地產股、REITs及恆指。
中小型股賣咗巨型資產唔派息，最後可能胡胡混混使咗佢或投資蝕咗佢，所以股價比資產有大折讓，情有可原，至於九倉……應該唔會嘅，昨天業績後逆市跌4%，純屬巧合吧。