青冰平常做研究，尤其是數據及通告，都慣性會看源頭，當然找google看新聞，幾分鐘就一文讀懂，想知道某件事，此舉是簡單快捷，但若果你想真金白銀下注，甚至成為重心股，這就很容易給人誤導，寫新聞及做評論的，對財經的理解不一定很深，若他是搬字過紙便好，最怕就是曲解了原意，或忽略了重點。
安寧(0128)在1月宣佈申請將荃灣顯達鄉村俱樂部，改為住宅用途，並向城規會正式提出，消息刺激股價由0.43，兩日內急升至0.97，飆1.2倍。大家都知道這些涉及城規會的，都不是一時三刻可以搞得掂，所以安寧都係隔幾個月炒一轉，之後又靜靜回落，五、六月間乘著細價股小陽春，一度炒至1.44元，不過近月市況咁差，自然敵不過地心吸力，上週低見0.66添。
佢哋8月公佈業績時，曾話過城規會將於11月2日舉行會議，咦咁咪即係今日？唔怪之得這兩天曾急彈至0.76啦。其實11月2日這日子青冰早就mark低，不過早兩星期再作深入研究，就知未係時候了。
城規會網站，其實會列出會議議程、開會日期、草圖及各申請的進度，簡單黎講係好多嘢睇，申請編號Y/TW/13的顯達鄉村俱樂部申請，地盤面積40000平方米，建議改建後會起9幢9至18層的住宅，總樓面面積將有60000平方米，個申請亦都非常詳細，有晒實地照片及發展草圖，每輪的諮詢都可以讓公眾發表意見，亦有deadline，限期後申請人將要回應有關查詢或作發展上作出改善及配合，而最新的諮詢將在11月16日完結，暫定會議日期係2019年1月4日。啊原來1月先開會喎，咁業績咪即係誤導？其實業績報告雖在8月底公佈，但又要埋數又要寫報告，整完仲要畀會計師核數師律師望一望，咁所以內容有點滯後也屬正常，可能寫報告時，城規會真係暫定11月2日開會嘛。而1月4日開會，網頁內都是寫暫定而已，青冰估計要睇11月16日限期後，仲有冇好多意見，如果仍有不少質詢，申請又要作回應，又要來多一round喇，如果係咁，1月都未必係開會時，但如果今次限期後冇乜feedback，似乎大局已定，就未必要等到1月開會時先來料喇。
網上資源有咁多，其實只要你有心做功課，一定可以知得更多睇得更通，真心講隻股到時炒唔炒都唔知架，但起碼知道timeline，心裡有數，萬一有異動，都要知黎料定係虛火嘛。
Fb個人專頁 http://www.fb.com/chingbing888